Cantadores de Torpè________________________Bustianu Pilosu

GOZZOS DE SANT'ANTONI DE SU FOGU

Sant'Antoni nd'est po te
custa 'idda in devossione,
a sa selema Torpè
po fagher su fogulone.

Carros carrigos de frasca
paren naves in su mare
no b'at bentu nè burrasca
chi las potada firmare
su mudregu an de carrare
custa est sa tradissione.

A sa selema Torpè
po fagher su fogulone.

Archimissa chin fioridu,
frore de Santa Maria,
romasinu amus batidu
frasca de donzi zenia,
sant'Antoni noch'imbia
sa tua beneissione.

A sa selema Torpè
po fagher su fogulone.

Cando s'inzorat sa luna
arveschende dae mare,
cando sa die s'ingrunat
de su note a su falare
tand'est ora de achicare
fogu, fogu a su muntone.

A sa selema Torpè
po fagher su fogulone.

De su fogu su calore
rujas faghet sas massiddas,
sant'Antoni de amore
nond'aporri un'ischintidda
faghe chi in paghe sa 'idda
vivat e in unione.

A sa selema Torpè
po fagher su fogulone.

Ses de sas framas su mere
sant'Antoni de su fogu
e ti pedo po piaghere
in s'istiu sicu e grogu
istudache in donzi logu
framaridas e chicones.

A sa selema Torpè
po fagher su fogulone.

Sant'Antoni nos azua
ch'olvidemas sos afannos,
gai po sa festa tua
subra de carrigos mannos
ancor'ateros chent'annos
cantamus custa cantone.

A sa selema Torpè
po fagher su fogulone.