Cantadores de Torpè________________________Bustianu Pilosu

ANNINNIA 
(A Elene fiza)

Istanote in su chelu
lughene chentu isteddos
drommini sos piseddos
drommin a sonnu isortu
su fogu sich'est mortu
e in sa note manna
serrada est donzi janna
serradu est donzi coro
chin d'una crae 'e oro.
Fiza chin cussa crae
su coro abberi e bae
sonnia d'ateras terras
inumbe sas chiterras
s'intendana sonende
e pizzinnos cantende
su ballu 'e tres antigu
e che campos de trigu
movidos dae sos bentos
lu ballene cuntentos,
ballalu finzas tue
lepia che una nue
bella chei sa die
fizedda mea rie,
e cando sa tristura
intrat in coro a fura
fiza non t'assucones,
cantali sas cantones
tristas, tristas, de babbu
tando chin bonu grabbu
lea su coro in manu
cantal'a pianu a pianu
a bogh'e ballu 'e tres
narali su chi ses
chi non tenes cadenas
chi non times sas penas
e libera as a istare
po cantu as a campare.
Ma como drommi coro
de babbu su tesoro
atesu in sa campura
fuet donzi tristura
subra montes nieddos
isterret unu velu.
Lughene chentu isteddos
istanote in su chelu.