Cantadores de Torpè________________________Bustianu Pilosu

SU FAEDDU SARDU
(sestina)

Est antigu che nuraghe
mesu rutu e semper reu
est unu limbazu intreu
eredadu chin sos trastos
e chin totu sos imbastos
de s'eternu faghe faghe.

No, no est faeddu ebbia
est de libertade famine
no l'isperdese nd'est gramine
e si lu laoras trigu
si lu chircas t'est amigu
e si l'amas poesia.

E tando cando s'inglesu
ch'hat a isperder s'italianu
in Casteddu e in Campidanu,
in Barbaza e Logudoro,
sos sardos in domo insoro
an a mantenner inchesu

custu faeddu antigu,
inchesu che una braja
umbe sulaiat jaja,
bi sulaiat manneddu,
bi sulat su pizzinneddu
bi sulat azigu azigu

ness'a la mantenner bia.
E custu faeddu sardu
areste chei su cardu,
chei su cardu ispinosu,
custu limbazu, mannosu
as a faeddare ebbia.

Custa limba at a abbarrare
in su coro, saborida
chei su pane de sa vida
ch'est su pane travagliadu,
che su pane carasadu,
carasadu po durare.

Si nono no nemas hois
si nos tratan che teracos
comente poveros macos
si su sardu no faeddamus,
chin su sardu noch'andamus
ca sa limba semus nois.