LAMENTOS D'EMIGRAZIONE
(sonete a coa)

Ma prite zertos unos no l'ismitin
a una bona 'olta 'e fagher male?
Ma puite non pensan e non riflitin
chi in Sardigna est terrore generale?

O non s'abbizan chi in donzi giornale
critigan sos fatos chi cumitin?
e sen'iscrupulu s'errore ripitin
degradende de totus sa morale.

Si sa morale aeren postu in pratiga
ca dat de s'onestade alta iscola
sa Sardigna prus bene fit istada,

sa tropu libertade democratiga
pro sos ch'an sos sentidos bola 'ola
lassat distruer cantu 'e bene b'ada.

Fura, bochire e ponner fogu an tatiga
dae s'Oristanesu a Siniscola
e dae Bonifaciu a Teulada.

LAMENTOS DE SA ZENTE EMIGRADA
(sonete)

Ma fin'a cando durat s'isperanzia
de torrare a sa Patria istimada?
S'est sa Sardigna nostra trascurada
senza b'aer trivaglios de importanzia.

E sa vile e perversa iscostumanzia
de su progressu impedit 'ogn'istrada,
sa zente sarda chi est emigrada
vivet in disperada circustanzia,

c'amus tanta preocupazione
pro Sardigna a sos fatos terrorosos
chi legimus continu in sos giornales,

e vivimus in s'emigrazione
umiliados, tristos e penosos
ca nos graman bandidos criminales.