Cantadores de Torpè________________________Efiseddu Pau

SIGHENDE SAS USANZIAS ANTIGAS
(terzina)

In custas festas tradizionales
de su Santu Nadale d'Annu Nou
totus paren amigos cordiales,

ca s'auguran bene a totu prou
chin astrintas de manos e iscritos
de si godire 'ognunu a gustu sou.

Sono sos augurios infinitos
d'amore, paghe, salude e fortuna
e rispetu a doveres e diritos.

Ca si pensamus: sa vida nd'est una
e cheret ammirada e rispetada
senza li fagher ofesa peruna.

De su benessere abbeglian s'istrada
annientene donzi malu faghere
chi finament'a como tentu s'ada,

imperene sas cosas de piaghere
chin sanu gustu de sana morale
chi potana sos coros sodisfaghere.

Siat custu su gridu universale
chi dae coro ispontaneu nascat
pro su bene de totu in generale.

Ca no est justu chi unu si pascat
in su mare de donzi ben'e Deu
mentres s'ateru de famine cascat.

De sa vera justissia s'impreu
imperet senza custas diferenzias
in totu cantu s'universu intreu,

pro godire tranchiglias sas cussenzias
senz'ingannu, odiu ne mineta
ch'ana brutales sas conseguenzias.

Su terrorismu, ricatu e vendeta,
sa camorra, sa mafia, sa droga,
fragellana sos coros che saeta.

O Deus Onnipotente prestu afoga
s'idea mala de barbaridade
chi distruit sa vida joga joga,

faghe regnare bona voluntade
comente annunziadu an sos Anghèlos:
pagh'in terra a s'intera umanidade
gloria a Deus in sos eternos Chelos.