Cantadores de Torpè________________________Efiseddu Pau

S'UMANU ISFRUTAMENTU
(moda)

Prima a protegere 'ogni re potente
faghian sos casteddos lussuosos
chin fortesas e d'armas s'arsenale,
a sos ch'in gherra 'ochian tanta zente
los festegiain de vitoriosos
dedichendelis un'arcu triunfale
e lis daian sa fama immortale
fizos de bona mama e bonu babbu
e pro su tronu corona e iscetru
colunna e monumentu innalzaian.
Immortale sa fama lis daian
fizos de bonu babbu e bona mama
e lis daian immortale fama
fizos de bonu babbu e mama 'ona
e pro su tronu iscetru e corona
fizos de mama 'ona e babbu 'onu
e iscetru e corona pro su tronu
innalzain colunna e monumentu
pro un'eternu, istoricu ammentu
d'eroe e campione universale.

Però tantu tribagliu colossale
fit fatu chin dolore e chin piantu
e sacrificiu, samben e suore
de sos poveros postos a bersagliu.
Però tantu colossale tribagliu
fit fatu chin dolore e chin piantu
però tribagliu colossale tantu
fit fatu chin piantu e chin dolore
e sacrificiu, samben e suore
de sos poveros a bersagliu postos
ca sos viles tirannos cori tostos
massacraian chena piedade
prite tenian tanta podestade
chin dogni mezu 'e torturazione.

Prima a protegere 'ogni re potente…
……………………………………...
d'universale eroe e campione.

E oje an cussa parte 'e su leone
sos chi d'isfrutamentu 'ogn'arte ischin
privos de sentimentu cristianu
usurpadores de sa razza umana.
Sa parte 'e su leone oje cuss'ana
sos chi d'isfrutamentu ischin dogn'arte
oje de leone an cussa parte
sos chi dogn'arte ischin d'isfrutamentu
privos de cristianu sentimentu
de sa razza umana usurpadores
e l'ischin totu sos osservadores
ch'ana 'idu, tocadu e an connotu
e sos osservadores l'ischin totu
chena bisonzu chi jeo lu proe.

Prima a protegere 'ogni re potente…
…………………………………….
d'universale e campione eroe.

Su mundu est uguale ancoras oe
si s'osservat su globu totu in tundu
s'iden sos ricos potentes in motu
contr'a sa razza plebea che peste.
Su mundu ancoras oe ugual'este
si s'osservat su globu tot'in tundu
ancoras oe ugual'est su mundu
si s'osservat su globu in tundu totu
s'iden sos ricos potentes in motu
che peste contr'a sa razza plebea
ca d'isfrutare solu ana s'idea
chena cumpassione, pena o dolu
de isfrutare s'idea ana solu
chena cumpassione, dolu o pena
de sambene, suore e carre anzena
sa buss'insoro ingrassan che mannale.
Prim'a proteger dogni re potente
faghian sos casteddos lussuosos
chin fortesas e d'armas s'arsenale.
Oe sos ricos sono ugualmente
protetos, rispetados, dignitosos
ca los garantit tantu Capitale,
e non s'importan propiu niente
de sos poveros tristos e penosos
declassados de forza e de morale
e pro cussu o Deus Onnipotente
sos poveros imploran lagrimosos
chi provedat riparu a tantu male.
Contr'a superbia, usura, avarizia
mandet amore, bontade e justizia
pro viver totu in fraterna amicizia
annientende 'ogni barbaridade,
s'odiu, sa vindita e falzidade
ch'est totu a dannu de s'umanidade.
Cesset de s'aprofitu dogni furia
s'ira, sa gula, imbidia e lussuria
e non b'apat prus astios d'ingiuria
Chin salude, cuntentu e bona sorte
e santa paghe in vida e dopo morte.