A SA SARDIGNA
(sonete)

Sardigna, diamante incastonadu,
mi pares tue posta in mesu mare
ca Deus de natura ti l'at dadu,
tesoro raru, fatu pro ammirare.

Ses astru in firmamentu collocadu,
chi s'infinidu des illuminare
e su valore ch'as incorporadu
tantu est chi non si podet calculare.

Su sole, sa luna, donz'istella,
s'aera, sa terra ei su mare,
minerales, metallos, fauna e flora,

de totu ses tue sa pius bella
ca ses reina digna de lodare,
ses subra a totus, superba signora.

A TORPÈ
(sonete)

Ecomi o Torpè in versu e rima
umiles (Deus pagu mind'at dadu),
contat da oe vintinoannos prima
cando pro Roma a tie apo lassadu.

Ma mai de te mi so ismentigadu
ca ti mantenzo sa mantessi istima.
Si m'est permissu ch'in versos m'esprima
pro chi 'enzat donzunu saludadu.

Sos fizos tuos e frades a mie
azzetadelos, sun de veru coro.
O zente torpeina cara e digna

Cun afetu saludo prima a tie
Dapoi sa provincia de Nuoro,
infines tota s'intera Sardigna.