Cantadores de Torpè________________________Salvadore Craba Mattiu

A SANTU TORPÈ
(moda)

Narat s'istoria verso s'annu trinta
de Torpè santu, martire, soldadu,
in sa citade de Pisa naschidu.
Fit de pagana famiglia distinta,
Caiu Silviu su babbu jamadu,
de sa mama su numen si est perdidu.
Creschet fieru, forte e istruidu,
Nerone afidadu lu at in corte
pro dirizer s'amministrazione
de so benes de su romanu imperu.
Creschet forte, istruidu e fieru,
Nerone afidadu lu at in corte,
fieru creschet istruidu e forte
in corte afidadu lu at Nerone
pro dirizer s'amministrazione
de so benes de s'imperu romanu.
Eloquente justu in coro umanu,
de totu amigu, puru intelligente,
umanu in coro, justu, eloquente,
intelligente puru, amigu 'e totu.
Poi at santu Paulu connotu

de portentos diventat vera ghia.

Lassat a parte sa idolatria
De Netunu, Diana, Jove e Marte,
e pro su restu chi falzos lu sunu
no s'inchinat pius ne si abbassat,
s'idolatria a parte la lassat
de Netunu, Diana, Jove e Marte
lassat s'idolatria a una parte
de Marte, Jove, Diana e Netunu
e pro su restu chi falzos lu sunu
no s'inchinat ne s'abbassat pius
ca sa via mustrada da Jesus
de gloria illuminada si presentat.

Narat s'istoria verso s'annu trinta…
…………………………………….
Vera ghia de portentos diventat.

Nerone lu insultat e turmentat,
lu minetat de persecuzione.
Cale siat martiriu azzetat
ma sos viles paganos no iscultat.
Nerone lu turmetat e insultat,
lu minetat de persecuzione,
lu insultat e turmentat Nerone,
de persecuzione lu minetat,
cale siat martiriu azzetat
ma no iscultat sos viles paganos.
Totu sos tentativos restan vanos
De Satellicu e ateros eventos.

Narat s'istoria verso s'annu trinta…
…………………………………….
Diventat vera ghia de portentos.

Cadenas duras, penas e turmentos,
non timet ne leones ne arenas,
ne palos, fogos ne fritas prejones
ne ateras terribbiles torturas,
penas, turmentos e cadenas duras
non timet ne leone ne arenas,
cadenas duras, turmentos e penas
non timet, ne arenas ne leones,
ne palos, fogos ne fritas prejones
ne ateras torturas pius terribbiles.
Eroe de sos eroes invincibiles
fra sos martires santos de cust'era.
Ma s'infame Silvinu, tigre vera,
cun s'idea su babbu 'e vendicare,
cun ateros tiranos at decisu
in s'ispiagia de Pisa su mare,
fit s'annu sessantoto de prezzisu,
su vintinoe de abrile su mese,
Torpè ligadu in manos e in pese
morit decapitadu dae s'ispada.
Sa conca sua in Pisa est cunservada,
in Franza ch'an su corpus sepellidu,
ue lu an acoltu e costruidu
una creja pro sos menzus onores,
cun rosas profumadas e fiores
an adornadu s'altare a su Santu.
Pro sas ispesas at meritu tantu
s'umile cristiana Cenerina,
opera santa de Deus divina
pro no esser Torpè ismentigadu.
Dae Pisa a Portugallu est veneradu
Torpè in Franza e Torpè in Sardigna.
E oe dae su chelu, anima digna,
pensa pro dogni sardu torpeinu
in oras de allegria e de dolore
donzi momentu li sias vicinu,
beneighe e cumpensa su suore
de s'emigradu in anzenu terrinu
dendeli forza, salude e fervore.
Poi de chent'annos de terrena istoria
A nos bider Torpè in s'alta Gloria.