S'AMORE SINZERU TANTU OSTACOLADU
(sonete)

Pustis de tantas penas e afannos
chi amus pro set'annos suportadu
ca zertas an ispinas semenadu
nos an fatu aversarios sos mannos,

ma oje sono barantachimb'annos
ch'amus s'amore nostru cunfirmadu
a sos pes de Jesus Sacramentadu
jurende fedeltade senza ingannos.

E rispetende cussu juramentu
tra ben'e males, giojas e fastizos
innalzamus a Deus innos e lodes,

prit'amus bidu creschere a intentu
sanos, onestos, sabios, oto fizos
e batordighi prosperos nebodes.

SOS FIZOS PRO SA MAMA
(sonete)

Sos fizos son sa gioja, su recreu
e chi los paghet no s'agatat oro,
son pro sa mama s'unicu tesoro
chi 'alen prusu d'unu mundu intreu.

Si son fizos in grassia 'e Deu
aman sa mama dae veru coro,
ca est s'amparu, ghia e lughe insoro,
dedita totu in su maternu impreu.

E bramat d'esser che rosas e lizos
bellos, sanos, onestos, virtudosos,
chin donzi donu nobile a sa manu.

Pregat semper a Deus Soberanu
ch'amen de coro e siene rispetosos
pro los gramare dignitosos fizos.