Cantadores de Torpè________________________Efiseddu Pau

MAMA SOLA

Mama, prite sa vida in martirizos
sena b'aer motivu bos ponides?
Prite chin arguais e fastizos
Mi sezis nende chi bos consumides?
Ello s'azis pesadu tantos fizos
e mancunu in domo nde tenides
pruit'est chi pranghides vanamente
o umbe sono no azis in mente?

Sos fizos de bos dare prus dolore
e de prangher chin lagrimas a rios
sono sos chi pro semper sos adios
bos ana dadu in su menzus frore
e non pranghedas sos chi sono vios
ca si sono lontanu est chin onore,
no est birgonza ne befe peruna
su esser fora in fatu sa fortuna.

Pensade ch'una l'azis cojuada
s'ateru est sa Patria servende
e jeo pro esser fora terachende
ite motivu est chi de prangher b'ada?
No la coledas sa vida afannada,
no siedas continu suspirende
pensende chi donz'essere animadu
devet andare a umb'est destinadu.