Cantadores de Torpè________________________Nicolinu Tarquini

SA LANA
(otava serrada)

Comerciantes benide a bidda mea
ch'azzapades sa lana a preju bassu,
ca senza mancu ponner unu passu
bonde 'atin de lana a sa cadrea
e sena andare pelea pelea
in su centru 'e sa 'idda b'est s'ammassu
e s'alzades a susu unu momentu
azzapades sa lana a perdimentu.

Prima fit sa bundanzia in Lodè
chi fit in dogni logu mentovadu
ma como l'at de meda superadu
a chentu 'oltas sa 'idda 'e Torpè
ca senza mancu movere unu pè
benit s'omine de lana imboligadu,
ca sa produzione de 'idda mia
superat a Muntagna e Baronia.

Pro cussu su pastore est cuntentone
pro su produtu chi sa lana est dende
ca finas zente istranza ch'at benzende
a nde leare a sodisfazione
e finas de diversa nazione
sono in Torpè sa lana comporende
ca son baranta pegos seberados
sena contare sos chi son cuados.

B'amus lana niedda 'e vera razza
chi bos incantat cando la 'idides,
dae vois e totu connoschides
sa 'endidora est ladina a sa fazza,
dae bassu alzende a sa piazza
bind'at de lana cantu nde cherides
e dae sa piazza azigu a susu
de lana nde zapades de piusu.

De lana in bidda mia bind'at meda
benide c'a baratu l'agatades
fina a soddu su chilu comporades
sa lana modde chi bos paret seda,
potides benner chin paga moneda
ca tantu su mantessi carrigades
ca sa lana in Torpè b'est abbundante
chi potet carrigare 'ogni mercante.

Chie a Torpè est bennidu turista
dae logos lontanos e vicinos
senza mancu ispender tres sisinos
de lana s'ada fatu sa provista,
sos furisteris faghen concuista
a chentu 'oltas prus de sos torpinos,
ca dogni furisteri ch'est bennidu
sich'est andadu de lana frunnidu.

Ma no cumbenit de la perlungare
pro no s'ofender calcuna pessone
si nono certamente sa cantone
ja la potia manna cumbinare,
però mi tocat de mi riservare
e lasso perder calchi ocasione
ca si mentovo de 'idda sa lana
bos naro in cale domo bonde dana.

Torpè chel'ana postu in prima ria
sas biddas de lontanu e de vicinu
non bolu narat solu Nicolinu,
bolu narat Muntagna e Baronia,
mi dispiaghet de sa 'idda mia
a chela calculare unu casinu
però ja nde connosco jeo puru
ch'inoghe chend'at meda de siguru.

Naran de sa Germania lontana
ca nanchi b'ana sa corruzione,
in bidda puru sa produzione
cant'e inie bundana sa lana,
senza contare sa zona romana
ch'at superadu dogni nazione,
però mi tocat de ponner su frenu
siat de logu nostru o logu anzenu.