Cantadores de Torpè________________________Nicolinu Tarquini

INVOCAZIONE A SA MADONNA
(otava serrada)

A tie prego vergine Maria
mama dileta de su Redentore
ch'as allevadu chin cura e amore
dae essende infante su Missia,
a tie fago una pregadoria
pro ti lodare e pro ti dare onore,
si mi das musa e mi dais talentu
cheglio faghere a tie un'argumentu.

Tue Maria tenes su podere
de mi dare talentu 'e ti lodare
e mi potas sa musa aumentare
a cunforma a s'idea e piaghere,
tue Maria tenes su podere
de mi poder sa mente illuminare
e si mi das talentu 'e poesia
onore e bantu ti dao Maria.

Ses mama de bellesa e de fortuna
angelica funtana de amore
ses mama de bellesa e de candore
reina de istellas, sole e luna
ses mama de su mundu sola una
guidatrice de su pecadore
tue ses mama de totu su mundu
consoladora de su moribundu.

Totu Maria ti solin pregare
in crejas, ispidales e cumbentos,
in tribbunales e dibbatimentos
totu a tie usana invocare,
sos chi sono in gherra pro gherrare
pregana a tie in sos cumbatimentos,
sos chi son cundennados in s'isiliu
ti pregan de lis dare domiciliu.

Totu sa oras ti pregan Maria
in ispidales e in minieras
in colunias, bagnos e galeras
totu ti faghen sa pregadoria,
soferentes de ogni maladia
pregan a tie manzanos e seras
dimandendeti azudu a los salvare
de cussas oras malas a passare.

Tue Maria as su mundu salvadu
gai nos salves da ogni tempesta
tue nos salves de ira e de pesta
e podas perdonare ogni pecadu
ei su mundu cand'est agitadu
sa manu tua lu ponzat in festa
ei sa zente ch'est vivende aflita
l'azues cun sa manu beneita.

Tue Maria as sa divinidade
su tempus malu lu torres in bonu
e dae su celeste e altu tronu
manda tue sa menzus dignidade,
des a sos cundennados libertade
e a sos pecadores su perdonu
e totu sos chi sono in suferenzia
azues cun sa tua onnipotenzia.

Maria t'at dognunu in coro sou
ca ses tue de totus prodetora,
t'ana pregadu e ti pregana ancora
e t'afestan dogn'annu 'e 'Inu Nou,
chin su dignu e potente brazzu tou
azua ogni emigrante chi ch'est fora
ch'a sa futura festa ch'an in coro
torret dognunu allegru a domo insoro.

Maria ses de grassias piena
mama diletta 'e su verbu divinu
su Signore cun tegus est in sinu
Su ch'at sufertu in sa vida terrena
e a tie Maria Nazarena
dae coro ti pregat Nicolinu
chi 'enzat custu tempus cambiadu
sena b'aer tristura e né pecadu.