A UNU 'EZZU
Pustis de sa morte de Bustianu Pilosu
(sonete)

Sa vida est breve de su cristianu
ca naschit e non s'ischit cando morit,
in zoventura isbociat e fiorit
comente son sos frores in beranu

ma cando 'enit omine anzianu
de forzas e vertudes s'isvalorit,
de colore su visu s'iscolorit
dae pili nieddu torrat canu.

Ca cun su tempus perdet su vigore
mancari siat che unu zigante
totu sos brios torran a niente.

Finas su sole ch'at tantu lugore
ispuntat su manzanu in su levante
ma su sera che morit in ponente.

A TORPÈ
(sonete)

Torpè ses piazzadu in pianura
sas muntagnas ti faghene corona,
amus su mare vicinu a sa zona
su chi nos mandat lentore e friscura.

Sa terra adata est pro s'agricoltura
rendet trigu, 'eldura e fruta 'ona
chi mancu sos terrinos de Anglona
possedin custos donos de natura.

Poi tenimus s'irrigazione
pro irrigare totu sos terrinos
ch'est de sa Baronia sa bellesa.

B'amus ortos de sindria e melone,
bellos frutetos, binzas e jardinos
chi coltivat sa zente torpinesa.