SA LEZE TRUFA
(sonete)

Si sa Democrazia Cristiana
omines de valore aeret tentu
no aiat discussu in parlamentu
un'ischema de leze pagu sana

po trufare sa zente italiana
cand'enit de votare su mamentu
ca cheren de ubbidire a mala gana
suta su jogu 'e s'aparentamentu.

Son sos solitos tiros de su mere
cand'imbrogliat su poveru teracu
po sighire a istare in su podere

e ubbidire a sentimentos notos,
però como su populu est istracu
de custa leze insoro fura votos.

SO SARDU MA...
(sonete)

Oje sos sardos non son che a 'eris
puros e fortes chei su granitu.
Mortos son sos Amsicoras gherreris
sos chi faghian baler su diritu,

chi pro non ruerene prejoneris
su coro issos e totu s'an trafitu.
Nois non semus dignos erederis,
sa razza est cambiada ite delitu.

Mortos son cussos e a postu insoro
pro disgrassia nostra e disaura
gridat sa 'oghe sarda 'e milli sinos:

in totue, in Barbagia, in Logudoro,
dae su Campidanu a sa Gaddura,
b'at naschend'una massa de istrozzinos.