Cantadores de Torpè______________________Antoni Maria Pala

RISPOSTA A TOMASU MUREDDU DE OTANA
(trintases)

Mureddu ses naschidu avanzaditu
e cheres morrer chin cussa 'idea
mustrende su difetu a gala vera.

Cando tocare a manu des s'aera
tando ti dene contare poeta
e de sa debilesa torras sanu.
Cando s'aera des tocare a manu
tando ti dene poeta contare
cando s'aera a manu des tocare
de poeta contare ti den tando
s'aera a manu tocare des cando
tando poeta contare ti dene,
ma no as cussa sorte, pagu bene!
ca ti mancat su sabiu intelletu.

Mureddu ses naschidu avanzaditu
e cheres morrer chin cussa 'idea
mustrende a gala vera su difetu.

Cheres fichire dente in s'oro netu
comente mai resessire des
da chi ses castigadu in sos poderes,
fichire dente in s'oro netu cheres
e resessire mai des comente
fichire in coro netu cheres dente
e comente des mai resessire
in s'oro netu cheres dente fichire
e resessire des comente mai
totu su tempus lu consumis gai
sos de talentu raru imbidiende.

Mureddu ses naschidu avanzaditu
e cheres morrer chin cussa 'idea
a gala vera su difetu mustrende.

Guastu mannu a sa musa fatende
a dannu de su vastu sardu lidu
e de sos poetones de Ichinusa.
Guastu mannu fatende a sa musa
a dannu de su sardu lidu vastu
mannu a sa musa fatende guastu
e de su sardu vastu lidu a dannu
a sa musa fatende guastu mannu
a dannu de su vastu lidu sardu
cun d'unu versu istropiu e bastardu
chi non falat su grammu in s'istadea.

Mureddu ses naschidu avanzaditu
mustrende su difetu a gala vera
e cheres morrer chin cussa 'idea.

Suta sa poderosa ispada mea
ruet domada sa pomposa zente
si pro pagu mi dedico un'iscuta.
De sa mea poderosa ispada suta
ruet domada sa zente pomposa
suta s'ispada mea poderosa
ruet sa zente pomposa domada
suta sa mea poderosa ispada
domada sa pomposa zente ruet
de duas una: o bi perit o fuet
pro chi siat che tue a conca russa.
Mureddu ses naschidu avanzaditu
mustrende su difetu a gala vera
e cheres morrer chin bidea cussa.

Si 'ogas cantu jughes in sa bussa
e atrogas su tantu sena imbrogliu
non podes comporare duas nughes
si 'ogas in sa bussa cantu jughes
e sen'imbrogliu su tantu atrogas
si cantu jughes in sa bussa 'ogas
e sena imbrogliu atrogas su tantu
si 'ogas in sa bussa jughes cantu
e atrogas su tantu imbrogliu sena
a totu sos collegas faghes pena
illusu 'e fagher cosa no isperes.

Mureddu ses naschidu avanzaditu
mustrende su difetu a gala vera
e chin cussa 'idea morrer cheres.

Si pro chent'annos in vida dureres
consumida in s'intentu 'e bona fama
ispirais pienu 'e disingannos.
Si dureres in vida pro chent'annos
in s'intentu 'e bona fama consumida
si pro chent'annos dureres in vida
de bona fama consumida in s'intentu
si dureres in vida pro annos chentu
consumida in s'intentu 'e fama 'ona
caru Mureddu sa frase perdona
ti dias morrer chin cuss'apetitu.
E cheres morrer chin cussa 'idea
mustrende su difetu a gala vera
Mureddu ses naschidu avanzaditu.

Totu perdono a tie, poveritu,
ca ses semprotu t'abbono pro cussu
ma non totu la pensan che a mie.
Poveritu, perdono totu a tie
ca ses semprotu pro cussu t'abbono
a tie totu, poveritu, perdono
t'abbono pro cussu ca ses semprotu,
poveritu, perdono a tie totu
t'abbono pro cussu ca semprotu ses
e mai dae conca fin'a pes
in s'ispregu 'e su justu ti ses bidu.

E cheres morrer chin cussa 'idea
mustrende su difetu a gala vera
Mureddu avanzaditu ses naschidu.

Pon'in mente abbarra costoidu
tantu sa zarra niente concluet
cand'est in s'operare impiastrone.
Abbarra costoidu in mente pone
tantu sa zarra concluet niente
abbarra costoidu pon'in mente
tantu niente concluet sa zarra
pon'in mente costoidu abbarra
tantu sa zarra niente concluet
s'abbilidade tua si riduet
a iscenadas de pagu cherveddu.

E cheres morrer chin cussa 'idea
mustrende su difetu a gala vera
naschidu avanzaditu ses Mureddu.
Chin custu avertimentu solamente
ponet in frenu sa sabia zente.

 

Carbonia, Triulas 1945