Cantadores de Torpè_____________________________Luca Doddo

CURRISPONDENZIA IN OTAVAS 
TRA COSOMO OGGIANU 
E LUCA DODDO

COSOMO OGGIANU

M'incumando non sias orgogliosu
ne ti fagas de tipu entusiadu,
e ne mai ti mustres corazosu,
non t'incantet medaglias e ne gradu,
pensa ch'est unu tempus disastrosu
e a chie in domo tua bi as lassadu,
ca in sa pedde regnat donzi cosa:
onore, gradu, interessu e isposa.

Collega a ti mandare sa cantone
nde tenzo pagu gustu e paga gana,
ca vivere in su monte Col di Lana
mi atit una bruta impressione,
ca paret chi in cadena postu m'ana
che Pellico, Maroncelli e Orobone
chi in sos tempos antigos son istados
dae sos austriacos ligados.

LUCA DODDO

Collega custa tua improvisada
est istada pro me unu consolu,
ca jeo vivo a sa disisperada
pro disgrassia mea semper solu,
su Bataglione meu est sardignolu
ma manc'unu de Torpè ne de Pasada;
e si chircas in su Regimentu
non bind'agatas de su mandamentu.

Tando mi naras chi a Col di Lana
ti atit una bruta impressione,
e si no benidiche a Monfalcone
e bides totu de su chi nos dana,
bene si chi in sa fronte italiana
in totue b'at ballos de cannone,
ma inoghe sas prus meraviglias
las son faghende sas iscuadriglias.

Inoghe sono sos aeroplanos
chi colan e bombardan a donz'ora,
palatos bellos de bator pianos
los son torrende a tanas de colora,
ringrazio basendemi sas manos
de comente vivende so ancora;
però su coro meu si cunfortat
cando m'iscriet chie mi acunortat.

S'andamus a sa veneta laguna
e visitamus chin bona intenzione
de sos sospiros s'istanzia est bruna
de Pellico, Maroncelli e Orobone,
umbe sa trista insoro disfortuna
chi fini presos in cussa prejone,
intro sa turre nde los an zacados
inumbe totu e tres sono ispirados.