Cantadores de Torpè_____________________________Luca Doddo

AMMENTOS 
DE SA GHERRA 1915/1918
(otava serrada)

Su Chentuchimbantunu Regimentu
bos trato de su primu Bataglione,
prima de intrare in su cumbatimentu
si narana sa santa orazione,
apenas cuminzada s'azione
currene totu a su trinceramentu,
ocupende sa linea contraria
ponzende s'inimigu a gamb'in aria.

Su Bataglione nostru fit cumpostu
totu barbaricinos volonteris,
d'Eleonora fizos gherrieris,
de samben sardu chin su coro tostu,
faghene setichentos prejoneris
e recuidos de su cumandu a postu;
senza sas armas e atovagliamentu
ch'aian issos in su trinceramentu.

Su die in Coldirosso ite disastru
mi tremo solu pro mind'ammentare,
cuminzo sa mitraglia a isparare
ma miss'est presentadu un'impiastru,
tando deretu cambio su nastru
e sigo cussa zona a rastrellare,
su rinforzu ch'andait a trincera
lu furriao dae sa crocera.

Deus l'ischit sos mortos e feridos
chi fin in cussa Valle de Verdona
mi tremo ancora ca los apo 'idos
sos chi fin ispirende in cussa zona,
gridende totu in trincera frundidos
pro non tenner sa medicaziona
e ca non bastain sos portaferidos
morian poveritos isvenidos.

Apenas terminada s'azione
falamus a riposu a Vallonara.
Musinu Cumandante 'e Bataglione
organizat a fagher una gara,
ca aiat a su cantu passione
in limba sarda de s'Isula cara,
c'amus sos trincerones ocupadu
cuntentu at custa festa organizadu.

Degheoto soldados cantadores
fimus iscritos pro sa poesia,
ateros bator fini sos tenores,
sos ateros fin totu in cumpanzia,
fin sos soldados e superiores
aplaudende chin tanta allegria,
faghene pro elegere sos biglietes
pro cantarene sos primos poetes.

Sos primos duos fin Doddo e Siotto
chi cuminzan sa gara chi an cantadu,
però su cumandante lis at nadu
a bistentare meda non lu poto,
ja l'ischides chi sezis degheoto
e comente est su turnu organizadu,
tres otavas per omine cantades
e cantan cuddos apenas zessades.

DODDO
Cara Patria mea Sardignola
cantu lu sento a che viver lontanu,
pro difender s'Istadu Italianu
s'Isula nostra lassadu amus sola,
pro che leare a Trieste e a Pola
dae sas manos de s'austrianu,
ca fin citades nostras mind'ammento
Gorizia, Trieste, Pola e Trento.

SIOTTO
Cuminzamus a dare primu iniziu
e poi sighin totu manu manu,
racontende donz'unu sacrifiziu
chi faghet su soldadu italianu,
ma ischimus chi est unu benefiziu
e disponimus su sambene umanu,
massimu sa provinzia de Nuoro
pro sa Patria dat anima e coro.

DODDO
Sassari, sa brigata prus famada,
orgogliosa e de gloria coberta,
de elementos sardos est formada
fizos d'Eleonora zente isverta,
un'illustre brigata mentovada
ch'in sa trincera dormit a s'abberta
brigata d'energia e de azardu
frutu de su jardinu Istadu Sardu.

SIOTTO
Siotto nde sigundat ater'una
pro chi tres rimas solu est a cantare,
augurende a tenner sa fortuna
de poter sas trinceras ocupare,
totaganta sa veneta laguna
chin sas posiziones fin'a mare
e de torrare sanos e cuntentos
totas duos sos nostros regimentos.

DODDO
Vivat donzi soldadu italianu,
vivan sos cumandantes de bataglia,
vivan muschetes e bombas a manu
e vivan sos cannones e mitraglia,
vivan sas naves e aeroplanu
chi assaltan trinceras e muraglia.
E auguro a che torrare sanos
sos chi son bios sos italianos.

SIOTTO
Sae tres rimas terminat Siotto
e intran Fadda e Masala a cantare,
si elezit un'ateru cumploto
pro sighire su cantigu avanzare,
sa musa regulare prus non poto
ca cuminzan sos versos a bundare
ca ja l'ischides chi sa poesia
prus avanzat prus bundat s'allegria.

Bastat! pro sa Brigata Sassaresa
non b'at atera fama europea,
cando l'an chircada si est difesa
inumbe bi fit issa in sa trincea
e mortos sì, ma mai l'an arresa
in monte Tebi e in monte Porea,
in Asiago e in Campanello,
in subra a Coldirosso e in Montello.

Patria cara apenas s'arrivida
ch'apo fatu a sa nostra frontiera,
apenas deghe dies in trincera
tent'apo in Col di Lana una ferida,
ma pro Issa disponzo anima e vida
ca so fizu de s'Itala bandera,
e si ruo in su campu 'e s'onore
moglio che unu sardu gherradore.