Cantadores de Torpè__________________Rimundu Manca

Nicola meu sa mela 'urata!
Nicola meu sa mela toddita!
apo azzapatu sa camba frundita
comente sos furones l'an secata.

Ite ti fago si ch'ana furadu
sa mela chin sa pira e marracoco,
ite ti cretes chi po cussu mi 'oco,
no so a cussu puntu fariadu,
po una note chi bi so mancadu
sos ladros b'ana fatu s'adunata.

Nicola meu sa mela 'urata!

Una e ateras notes bi mancais
no dias como sas neches a mie
ca mi pesao prima 'e 'acher die
tue corcatu in letu t'abbarrais,
chin tempus, tardu mannu ti pesais
e jeo in su tanchitu disgrassiata.

Nicola meu sa mela 'urata!

Tue faeddas che maca chi sese
nende chi in su tanchitu non dromia;
finzas a mesanote b'andaia
no una 'orta ma duas e trese,
ma su furone ca est mala rese
su manzaneddu s'opera l'at fata.

Nicola meu sa mela 'urata!

Nara Nicola it'amus a cumparrere
a dainnantis de su mere Dalu
ca no nd'aiat assazatu galu
e como ch'itet sa mela iscumparrere,
bisonzat carchi 'aula de li narrere
pro no esser in totus abbissiata.

Nicola meu sa mela 'urata!

A su mere li naras chi su 'entu
ch'at faladu su frutu e i sa foza,
ja l'at a bajulare a mala 'oza,
isse l'ischiat chi da bi fit su tentu
e tue prus faeddende istas atentu
e so siguru chi non ti maltratat.

Nicola meu sa mela 'urata!

No, bandabi tue custu sero o crasa
e jucheli a su mere sa notissa,
si non b'est issu lu naras a issa
o a sa 'iza Maria lu nasa,
cantu chi custa nova jutu l'asa
'aches prestu a inoche sa torrata.

Nicola meu sa mela 'urata!

Totu cheres chi pense e faga jeo
ma tue chi non ti movas pei torta
m'a mala gana b'andas custa 'orta
si nono su prus fuste mannu leo
e de ti pistare non mi arreo
chi t'apo a fagher modde che tamata.

Nicola meu sa mela 'urata!

Eh, si a tocare a mie ses marranu!
no ses ancora mazande a Preteddu
ca prestu bi lu naro a Marieddu,
a Pascale, a Luisu e Gaetanu,
si totu cussos ti ponene manu
ch'essis che soriche in arjola fata.

Nicola meu sa mela 'urata!
Si non ti mazo e mi mantenzo in frenu
no est po timer a cussa canaglia
ca jeo puru nd'apo de iscaglia
chi nde mantenzo un'uturu prenu,
marranu chi ti 'essat manc'alenu
diaulu 'e sa 'entre chi t'at fata.

Nicola meu sa mela 'urata!

Dassa istare Nicola cussu ardore
ca no est debbatas s'isto a limbaredda
nanchi mi comporao sa 'unnedda,
sas iscarpas e i su macatore
ma so restata chin pena e dolore
senza sa mela e istraziata.

Nicola meu sa mela 'urata!

Bastat! finila como Pascallina
non cheglio prus a minde mentovare
ca non torro tanchitu a nde tentare
mancu po ruere in perfeta ruina
ca m'at segadu renes e 'ischina
sa mela ja l'an apida barata.

Nicola meu sa mela 'urata!

No! a mala gana pico su tanchitu
ca ja 'ito chi b'est su torracontu
ma tue sa pinneta 'ache a prontu
e non t'abbarres a manos in chitu
ca siet a tempus caldu e tempus fritu
m'an a biter che anima airata.

Nicola meu sa mela 'urata!