Cantadores de Torpè__________________Maria Zosepe Funedda

Maria Zosepe atritos satiricos nde at tentu chin parizzos cantadores chi disizaian de l'intendere cantende a bolu. Prus de unu l'inzediaiat pro la cherrere faghere cantare, ma sicomente fit semper in currutu issa rispondiat a naradura chena cantare.

RISPOSTA IN UNDIGHINA

Dia cherrer cantare
mancari pagu 'ona
s'aia jutu pannos de allegria
e nde dia tratare
si sa 'oghe mi atonat
a ti rispondere in sa poesia
dia cantare forte
ma non cheret sa morte
ca m'at postu su coro in angustia
poesia apo meda
cantu nd'apo cusidu pannu e seda.

Tramas cantu jughiat
su brocadu, su pannu,
terziopera e seda apo cusidu
gai apo poesia
ti juro sena ingannu
e ti lu poto dare garantidu
apo sa tanta vena
ma la mantenzo in pena
ca jeo donzi godire apo perdidu
comente imprejonada
gai mantenzo sa vena inserrada.