Cantadores de Torpè__________________Maria Zosepe Funedda

E chin zertos insistentes rispondiat chin modos aspros e picantes comente in sas undighinas sighentes:

TI PREGO NO M'INZEDIES
(undighina)

Non mi piaghet no
a rispondere a tie
ca mai nde apo tentu disaogu
ma ti naro però
s'inchimeras a mie
ti juro chi non cantas prus in logu
ca si cantas chin megus
tinde torro in issegus
che criatura ti fago su fogu
ca so che fogu ardente
ti canto poesia diferente.

Ti prego non m'inzedies
menzus mudu ti abbarra
e non sigas sa tua cantilena
atentu non m'atedies
ca no amo sa zarra
m'abbastat cantu so in dolu e pena
non sias provocante
iscas ch'a donz'istante
poto afrontare in poetica vena
e pro aterrare a tie
pagu si crese mi costat a mie.

Non cheglio precipitu
non nde peses de 'oghe
e lassa in pasu sa pessone mia
t'at a ponner su fritu
senz'ennere a inoghe
si t'ammentas su numen de Maria
poesias t'intono
mutos malos e bonos
e chin tegus mi cazzo s'angostia
ti deves ammentare
mi chi non cheglio a mi precipitare.

Ja l'as su piaghere
ei s'opinione
ma chin megus ti cantas a sa sola
ca ses maza-muzere
cheres postu in prejone
pro ti educare chin menzus iscola
ti potan cundennare
a zella circulare
su manigu ti falene a tagliola
cantu duras vivente
chi sias brivu de nde 'ider zente.