Cantadores de Torpè________________________Andria Chessa

S'AGRUSTU
(sonete)

Un'agrustu tenia in sa corte
dae meda tempus fit abbandonadu,
no essende dae me prus pudadu
no fidi che a prima bellu e forte

e paret chi sa falche de sa morte
apat po isse sa lama arrodadu,
da ch'at che bezzu s'ischina mujadu
abbandonadu a sa propia sorte.

De bonu grabbu l'apo postu manu
pudendelu chin fortighe e serracu,
azis a pessare chi sia macu,

sas cambas sicas pudao a pianu
ca mi pariat un'essere umanu
chi de vivere non nde fit istracu.

 

MUTOS

Lagrima inasprida
chi falas dae chizos
e m'infundes sa cara.

No mi la contes vida
ca penas e fastizos
la renden tropu amara.

 

 

Patire ja mi tocat
chin pena e dolore
sas lagrimas tratenzo

Chi bi nascat su frore
in mesu ei sa roca
ite isperanzia tenzo.