Cantadores de Torpè________________________Bustianu Pilosu

Cantone posta pensende a su film ziradu in Torpè in su 1961:
"Le due leggi" de Edoardo Mulargia

 

ULIMOS IN SU 'ENTU
(duina)

Poscas tres meses de sole e sicagna
totu allagada oe est sa campagna

ma su trainu chi mi dat anneu
bundat in costas dae frade meu.

E ja est nudda su raju faladu
su t'ider goi totu insambenadu,

frade istimadu fis eris cuntentu
como ti miro fritu e in pamentu,

vida istudada che una ischintidda
oh, temporada isperde sa 'idda!

Custu manzanu l'an fatu su dannu
ca l'ana mortu in s'ulimu mannu,

s'ulimu nostru o s'ulimu insoro,
mancu chi aperet sas fozas de oro.

De oro invezzes o frade fis tue
però sa morte comente una nue

ti ch'at leadu che bentu a su fumu
in sas petorras tres ballas de prumu

e custu mare de samben caente
carragliat totu su logu, sa zente,

tancas, montrigos, bidda e nuraghe,
inintro 'e coro no bi lassat paghe

unu tanchitu una soca 'e terra
iscadenadu at s'odiu e sa gherra

e cras manzanu abberit sa cazza
sa raighina ch'isperdo, sa razza.

Poveru frade ses fritu che nie
ma como vives inintro 'e a mie.

Dromidi frade ca semus in duos
sos brazzos meos son como sos tuos,

serenu frade dromi e reposa
luego abbeglio un'atera losa.

Cagliade mama lassademi istare
a frade meu apo a vendicare,

no mentovedas a lagrim'in chizos
de cussas reses muzeres e fizos

o pezz'a nois tocat a pranghere?
Ite cherides, chi sigan a annanghere

ateru lutu o mama po vois?
Ateras ballas b'at prontas po nois.

Chin cussa zente de intragna mala
sa caridade ponide a un'ala,

ponide a banda donzi caridade
non b'at perdonu non b'at piedade,

chin cussa zente de animu vile
bi cheret pezzi corazu e fusile.

A sa zustissia si abbarro apitu
m'an a agatare teteru e fritu

est unu ebbia oe su caminu,
a manu tenta so chin su destinu

chi m'at serradu in cara sa janna.
Miseru chie non bogat sa sanna!

Pranghide mama ja nd'azis rejone,
sa vida nostra? Un'illusione!

Illusione chi como est finida,
in disisperu si mudat sa vida.

Non so naschidu po esser mortore,
non so pesadu po dare dolore

ma su dolore in corpus mi 'uddit
e sa carena mi tremet, m'atuddit,

in custa notte de abba e de fritu
cand'a sucutu si pesat s'atitu

de mama nostra chi cantat s'ammentu
de custu fizu mortu e in pamentu.