Cantadores de Torpè________________________Juanne Pau

IN SAS PENAS DE S'AMORE
(sesta lira)

S'adorada mia dea
una risposta non m'at dadu ancora
e dae ora in ora
m'aumentat in coro 'ogni pelea.

Musa bella amorosa
solu tue m'ischis cunfortare,
in cust'ora penosa
chi no isco sa conca a ue atribbare,
e si chi tenzo amore
mi lassat afogare in su dolore.

Su turmentu 'e su coro
mi faghet aumentare dogni pena
e mi sento che moro
chi 'enit trasportadu in terra anzena,
in sa nave inserradu,
senz'aere sos chi amat saludadu.

Ahi ite pena forte
sento in coro, in custu atendere,
pro s'amorosa sorte
ca no isco si gioja mi det rendere
o si mi dait dolu
pro passare sa vida in discossolu.

Mi sento che relitu
in balia 'e sas undas de su mare,
chi bramat unu situ
ue de nou poter ancorare.
E jeo in sa chi bramo
Pro ischire si m'amat cantu l'amo.

Cando chi 'ogni puzone
'ido dae ratu in ratu, ammorazzende,
s'insoro passione
m'est, coro, 'ogni pena aumentende
e timo chi in deliriu
la fina ca est tropu su martiriu.

Si l'ido passizende
mi mandat dogni tantu unu sorrisu,
chi paret siat nende
"ses tue s'adoradu miu acisu"
ma a sa mia proposta
ancora non m'at dadu una risposta.