Cantadores de Torpè________________________Metodio Dalu

MUTOS

Sa bella zoventura
totu 'estida a festa
faghet sa passizada.

Sa bella zoventura
Sa 'idda est populada
de zente sabia, onesta,
laboriosa e pura.

 

 

A sa festa patrona
mi 'esto allegramente
pro incontrare a tie.

A sa festa patrona
Si tue amas a mie
s'amore meu ardente
ti faghet de corona.

 

 

Custa note serena
trapunta de isteddos
m'invitat a pensare.

Custa note serena
Non poto reposare
pro sos tuos faeddos
ca mi dan tantu pena.

 

Bianca luna d'austu
lughes che a de die,
bella pro ammorare.

Bianca luna d'austu
Dia poter 'istare
pro amare a tie
senza chena, senz'ustu.

 

 

Custa note isteddada,
chin sa luna lughente,
isparghet allegria.

Custa note isteddada
Prima non bi creia
a su chi nat sa zente
chi ses apalpuzada.

 

 

Cando 'enit austu
sa luna bella e bianca
caraterizat su mese.

Cando 'enit austu
De cantu bella sese
pares una corranca
mi servis de assustu.