ISTA SIGURA
(sonete)

Ista sigura! no mi so pentidu
si t'apo seberada in mesu 'e tantas...
ancora de bellesa ti ammantas
fra tantas perlas raras ch'apo 'idu.

Tue m'as fatu perder su sentidu,
su coro l'as in manu e tinde 'antas,
de tantu afetu meu non t'ispantas
pro cudd'amore immensu ch'as rezzidu.

Si mi lasseres tue ite dolore!
si 'essis e 'istentas a torrare
su coro mi s'istringhet in s'incassu,

onzi momentu ch'intendo unu passu
mi faghet in su pettus zocheddare
ca penso chi ses tue, caru amore.

CUSTA NOTE
(sonete)

Custa note in sonnu ti apo 'idu,
tenias chimbe frores delicados:
fin totu bellos, meda profumados
ma unu, azigu, pariat ingroghidu.

As nadu: cussos frores son sos fizos,
frutos galanos d'amore perfetu,
ma unu est naschidu chin difetu
e pro isse son tantos sos disizos...

Sa Natura m'at cherfidu servire
calighes de dolore e de fastizos
pro custa criatura isfortunada.

Chin tantu afetu l'amus carignada
totus unidos chin sos mannos fizos
pro afrontare umpare s'avenire.