AMMENTOS
(sonete)

Si un'istante reposo in su divanu
mi torran a sa mente milli cosas,
sono ammentos de sos annos rosas
de unu tempus lontanu lontanu:

m'ido pizzinnu de oto o noe annos
currende isculzu a brincos che murone,
chin su coro cuntentu che puzone,
chin s'animu serenu e senza afannos.

Torran in mente totu sos ispannos
godidos in sa durche zoventura
cando sa vida non fit una pelea.

Como ses cambiada vida mea,
mancat sa forza, perdes sa durcura,
ca sono cuminzados sos malannos.

A DANIELA
(sonete)

S'ischeres cantu bramo, fiza amada,
chi dae Barcellona, in terra anzena,
a ue, tempus faghet, ses andada,
torres bidente cuntenta, serena.

Pro te amus piantu e isperadu,
cando tres meses faghet ses partida,
chi s'interventu tantu delicadu
aeret tentu bona resessida.

Un'ignota pessone, isfortunada,
donendet'una parte 'e s'oju sou
vivet ancora in sa vida tua:

at fatu in modu chi sa lughe sua
si siat trasferida in s'oju tou
e tue a bider bene ses torrada.