A CHIE NO AT FORTUNA
NUDDA LI 'ALET CHI SI PESET CHITO
(sonete)

A tempus sou 'ogni cosa procedit
dae cando su mundu si est connotu,
sa voluntade no cumandat totu
ca atere b'at prus forte chi l'impedit.

E no est semper chi a tempus li zedit
cant'unu 'e cherrer fagher est devotu,
sa voluntade li dat briu e motu
però sa sorte 'ogni tempus li medit.

Infatis pro chi nd'idas sa rejone
e ch'ater puru servat de guida
unu diciu de sabios ti zito:

in cust'umana generazione
si unu sorte non tenet in vida
nudda li 'alet chi si peset chito.

A DOMANDA: RISPOSTA
(sonete)

Ite nd'as de ischire su chi so,
si so semper mantessi su chi fia,
prim'improvisaia poesia
discretamente, invezzes como no.

Calch'olta in taulinu mi bi pro
a fagher versos de donzi zenia
ma mi 'essin d'iscarsa maestria,
paga cosa de bonu a lughe do.

Mi b'impigno chin pesu, metru e lima
pro adatare donzi versu a tonu
ma semper lanza mi 'essit sa rima.

Ma como creo chi non so prus bonu,
anzis m'abbizo chi non so che prima,
so solu de lassare in abbandonu.