A UNA ZOVANA
(sonete)

Oje sa limba no mi est bastante
a narrer cantu tenzo in coro e mente,
ca ses bella, simpatiga, atraente,
chi donzi coro lu faghes amante.

De sos aflitos consolu apagante,
cunfortu, ghia e lughe risplendente.
Ses sabia, onesta, intelligente,
a Deus e a su prossimu costante.

A bind'aer un'atera che tue
dificile lu creo oje in die
ca tenes donzi grassia a sa manu.

Tue ses cale sole senza nue
e pensan totus chi apat dadu a tie
sos menzus donos Deus Soberanu.

A UN'AMIGU DIFENSORE DE SA CLASSE OPERAIA
(sonete)

Prus d'una 'olta in prus d'un'assemblea
t'ap'idu acaloradu faeddende,
su diritu 'e sa plebe difendende
contr'a sos mannos de pessima 'idea

chi tenen solu sa prosopopea
de s'ideren in altu cumandende,
senza pensare a sos chi son sufrende
in sa prus cruda miseria fea,

chi s'iden obligados a partire
in terr'anzena a chircare trivagliu
chin penas in su coro e martirizos,

ca lassan Patria, domo, isposa e fizos,
ponzendesi sa vida a repentagliu
chin conseguenzias: Deus l'at a ischire.