Cantadores de Torpè________________________Efiseddu Pau

Est unu de sos duos curadores de cust'opera subra a sa poesia torpina. Est naschidu in Torpè su 23 de nadale de su 1918. Fizu 'e arte, ca est fizu de sa biada de sa poetessa Maria Zosepe Funedda e nebode de Efiseddu Mattiu, est creschidu a pane e poesia e dae sende minore imparaiat sas poesias a memoria e cantaiat in poesia. Dae cando in sas iscolas elementares at imparadu a iscriere at cuminzadu a goglire iscritas sas cantones chi cantaiat o intendiat dae sa mama e dae ateros poetes de sa 'idda. Istudiosu de donzi cosa sarda e massimamente torpina est oje una miniera de istoria torpina e de poesia.
Amigu e dischente, in contu de poesias, de sos menzus cantadores de 'idda, massimu de ziu Antoni Maria Pala, chi 'isse contat unu mastru, chin custos at imparadu s'arte de su cantigu a bolu. At cantadu in palcu chin poetes mannos siat i Torpè chi in Tiniscole e in ateras biddas de sa Baronia e finzas in s'estero. Forzis s'arte sua fit propiu cussa de su cantigu a bolu ma sa sorte non l'at azuadu po poter sighire sa carriera de poete de palcu. S'est adatadu a fagher medas trivaglios, dae su panateri a sa guardia forestale, dae su massaju a su casaru. In su 1961 est depidu emigrare in Germania inumbe at trivagliadu po 25 annos e umbe est abbarradu dae pensionadu pro ateros degh'annos, impignendesi comente volontariu in su Patronato ACLI, finzas a su 1996 cando sich'est ghiradu a bidda. In Augsburg (Baviera) at fundadu su Patronato ACLI e nd'est istadu Responsabile ACLI pro sa Baviera. Comente sindacalista est istadu Membro Fiduciario del Consiglio di Fabbrica in sa MAN. Fundadore de sa Lega dei Circoli Sardi in Germania, fundadore e presidente de su Circulu Sardu de Augsburg, in custas atividades s'est distintu pro s'onestade e pro s'impignu semper costante pro azuare sos cumpanzos emigrados e pro mantenner bia sa frama de sa cultura sarda in sas cussenzias de sa zente custrinta a viver atesu dae sa Sardigna. In Augsburg at organizadu in s'annu 1964 sa prima gara poetica sarda in Germania chin sos poetes Sotgiu, Masala e Zizi; gara chi est istada registrada e chi si contat famada in totu sa Sardigna. In custos ultimos annos at partecipadu a sas duas ediziones de su Cuncursu de Poesia sarda "Torpè" lende un'annu su primu e s'ater'annu su terzu premiu.