Cantadores de Torpè________________________Nicolinu Tarquini

SIGFRIDO
(mutu retrogadu)

Sigfrido fit conte
Genovefa reina
de Sigfrido isposa
e an fatu unu fizu
in sa citade sua
e lu jughen a bantu
de sa sua bellesa
fini totu cuntentos.
In mesu 'e s'allegria
benit d'improvisada
de partire a sa gherra
ca sa zitade insoro
fit proposta a gherrare.
Eco chi su distinu
si fit avicinende.
Pro tenner pius pena
in sa dura bataglia
l'at iscritu s'ingannu
Golò su traitore
chi sa sua muzere
si daiat cun chie.
E innossentemente
l'at posta in supriziu.
In dun'adde set'annos
est restada afrigida
cun su fizu abrazzadu
trista che unu moro.

Sigfrido fit conte
Tue pares sa rosa
dae totu ladina
de su nostru orizonte

Genovefa reina
Tue pares sa rosa
de su nostru orizonte
dae totu ladina.

de Sigfrido isposa
Dae totu ladina
de su nostru orizonte
tue pares sa rosa.

e an fatu unu fizu
Chei sa rosa intantu
narat sa cara tua
chi tenes assimizu.

in sa citade sua
Chei sa rosa intantu
chi tenes assimizu
narat sa cara tua.

e lu jughen a bantu
Narat sa cara tua
chi tenes assimizu
chei sa rosa intantu.

de sa sua bellesa
Totu sa gerarchia
unida a sos momentos
pro ti dare grandesa.

fini totu cuntentos
Pro ti dare grandesa
totu sa gerarchia
unida a sos momentos.

in mesu 'e s'allegria
Pro ti dare grandesa
unida a sos momentos
totu sa gerarchia.

Benit d'improvisada
Comente lughet s'oro
gai brillat sa terra
pro sa tua mirada.

de partire a sa gherra
Comente lughet s'oro
pro sa tua mirada
gai brillat sa terra.

ca sa zitade insoro
Gai brillat sa terra
pro sa tua mirada
comente lughet s'oro.

fit proposta a gherrare.
Su 'eranu cantende
cun sas rosas continu
ti solit coronare.

Eco chi su distinu
Su 'eranu cantende
ti solit coronare
cun sas rosas continu.

si fit avicinende
Ti solit coronare
cun sas rosas continu
su 'eranu cantende.

Pro tenner pius pena
Ti dichiaro amore
rosa ca ses ispannu
chei s'ermosa Elena.

l'at iscritu s'ingannu
Ti dichiaro amore
chei s'ermosa Elena
rosa ca ses ispannu.

Golò su traitore
Chei s'ermosa Elena
rosa ca ses ispannu
ti dichiaro amore.

chi sa sua muzere
Cando non bido a tie
mi rizirat sa mente
de su dispiaghere.

si daiat cun chie
De su dispiaghere
mi rizirat sa mente
cando non bido a tie.

E innossentemente
Cando non bido a tie
de su dispiaghere
mi rizirat sa mente.

l'at posta in supriziu
Ti amo totu vida
chena b'aer ingannos
dae su primu iniziu.

in dun'adde set'annos
Ti amo totu vida
dae su primu iniziu
chena b'aer ingannos.

Est restada afrigida
Chena b'aer ingannos
dae su primu iniziu
ti amo totu vida.

cun su fizu abrazzadu
Sas craes de su coro
tot'a tie apo dadu.

Trista che unu moro
Tot'a tie apo dadu
sas craes de su coro.