Cantadores de Torpè________________________Nicolinu Tarquini

A MUZERE MIA
(trintases)
Sos ojos tuos bellos cun su coro
pienos de amore e de afetu
mi naran chi costante tue mi amas.

De passione ardente m'infiamas
ch'in sa mente bi jugo visione,
m'infiamas d'ardente passione
ca visione bi jugo in sa mente,
m'infiamas de passione ardente
in sa campagna, in bidda e in totue.

Sos ojos tuos bellos cun su coro
pienos de amore e de afetu
mi naran chi costante mi amas tue.

M'agato inoghe e minde sero incue
e cunsidero ca cun tegus trato,
mi sero incue e inoghe m'agato
e ca trato cun tegus cunsidero,
m'agato inoghe e incue mi sero
ca son afetos de unu veru amante.

Sos ojos tuos bellos cun su coro
pienos de amore e de afetu
mi naran tue chi m'amas costante.

Ses un'istella lughente e brillante,
gentile, atraente e tantu bella,
ca ses brillante e lughente un'istella
tantu bella, gentile e atraente,
ses un'istella brillante e lughente
sena peruna macula in difetu.
mi naran chi costante tue mi amas
sos ojos tuos bellos cun su coro
pienos de amore e de afetu.

Su tratu tou sinceru e perfetu
ti juro abberu de cantu m'as fatu,
su sinceru e perfetu tou tratu
cantu m'as fatu ti lu juro abberu
su tratu tou perfetu e sinceru
est donu chi t'at dadu su Signore.

Mi naran chi costante tue mi amas
sos ojos tuos bellos cun su coro
pienos de afetu e de amore.

Ses de jardinu unu raru fiore
chi vives pro amparu in custu sinu
fiore raru ses d'unu jardinu
ch'in custu sinu vives pro amparu
ses de jardinu unu fiore raru
chin suaves profumos e amenos.

Mi naran chi costante tue mi amas
sos ojos tuos bellos cun su coro
de amore e de afetu pienos.

Non disizo pius benes terrenos
ca chi mi tenes caru mind'abbizo
pius benes terrenos non disizo
ca mind'abbizo chi caru mi tenes
non disizo pius terrenos benes
pro me ses tue s'unicu tesoro.
Pienos de amore e de afetu
mi naran chi costante tue mi amas
sos ojos tuos bellos cun su coro.

Chi mi sias fidele solu imploro
e cantu duro consolu mi dias,
imploro solu chi fidele sias
e cantu duro mi dias consolu,
chi mi sias fidele imploro solu
pro nos render fideles totos duos.

Mi naran chi costante tue mi amas
pienos de amore e de afetu
su coro cun sos ojos bellos tuos.

Chei sos de Cupidu dardos suos
sos tuos isguardos m'an feridu,
chei sos suos dardos de Cupidu
m'an feridu sos tuos isguardos
che sos de Cupidu suos dardos
c'as achistadu ogetos e pinzellos.

Mi naran chi costante tue mi amas
pienos de amore e de afetu
su coro cun sos ojos tuos bellos.

Ses adornada digna de modellos
chi simile in Sardigna non chend'ada
ses digna de modellos adornada
chi non chend'ada simile in Sardigna
ses adornada de modellos digna
e t'apo postu un'amore profundu
chi pro me ses sa menzus de su mundu.