Cantadores de Torpè________________________Pepinu Coronas

OTAVAS

So sardu ma non so barbaricinu,
nemancu de Gaddura e Logudoro,
non so campidanesu, nè ozastrinu,
ma sa provincia mea nd'est Nuoro;
de pianura so non muntagninu,
d'esser aculzu a mare anzis m'onoro,
iscas però chi non so planalzesu,
eo so veramente baroniesu.

Apartenzo a s'Alta Baronia,
cudda chi a Posada fit sugeta
cando zente d'Ispagna e de Turchia
fin d'Ichnusa flagellu e mineta,
inue de s'antiga Feronia
formein puru ruina cumpleta
cando chin sarachenos e piusu
fin de s'Isula nostra tristu abbusu.

Apuntu pro una simple cognizione
de Feronia chelzo ispiegare:
inumbe Torpè tenet s'istazione
cand'a Nuoro tenet de andare
o a parte d'Olbia o de Longone
precisu incue a fazza de su mare
bi fit sa muraglia e una porta
de Feronia antiga como morta.

 

 

 

Eo so sardu e i sa Patria istimo
narait frade meu in sa trincera,
promore sua sa morte non timo
cant'orrorosa siat e fiera,
de su menzus tesoro eo arrimo
pro sa Patria mea verdadera
e pro s'amore chi no ismentigat mai
"chi per la Patria muor vissuto è assai"

 

 

Su crere in su destinu est un'errore,
su mundu est in piena libertade,
esser galante o esser pecadore
cunsistit chin sa nostra voluntade
e pruite su Cristos de s'Amore
mort'in sa Rughe est pro s'umanidade?
Si pro destinu pecheret s'omìne
codice chin Vangelu a cale fine?

 

 

Fizos de Roma faghene ausentu
a pes de Monte Nurres chi in antigu
fit Monte Linnas Brunas jamadu,
faghen jardinos chin raru talentu
piantan binzas e semenan trigu
sa 'idda 'e Torpè ana fundadu
in costas d'Ichnusa a su levante
de s'illustre Feronia bighinante.