Cantadores de Torpè________________________Pepinu Coronas

Fit naschidu in Torpè su 30 de jannagliu de su 1907 e nd'est mortu in Torpè su 6 de Maju de su 1984. De una familia benistante, su babbu fit de sos Coronas de Tiniscole e i su babbu de sa mama fit de sos Sannas de Bitti, aiat istudiadu in su Liceu Classicu de Nuoro, ma no at potidu prosighire sos istudios pro sos graves problemas de familia e de salude (teniat una maladia a ogros e si lamentaiat: "apo sos ogros prenos de ispinas").Fit un'omine religiosu e bonu, umile e rispetosu chin totus. Impignadu in s'Azione Cattolica in Torpè est istadu fundadore de sas "Cunferenzas de San Vincenzo" in favore de sos bisonzosos de sa 'idda. A Pepinu Coronas si depet su meritu de sa prima posta de Sa Rughe subra sa roca de Monte Nurres, sa prima istatua de Maria Ausiliatrice in Biddanoa, comente sa Madonnina de sa Consolatrice in sa Toedda. A isse si depen puru sa chirca de sas notissias de santu Torpè e s'istatua de su Santu in bestes de soldadu romanu chi si potet ammirare in sa creja parrochiale de 'idda. In sa fide religiosa e sa morale catolica est cazadu totu su suzzu de sa poetica de Pepinu Coronas ca po isse sa fide in Deus fit sa vida mantessi. Istudiosu de istoria e connoschidore de su territoriu de Torpè e de s'Alta Baronia, at dedicadu a sa 'idda e sas bellesas naturales de sas zonas de mare una corona de sonetes chi in parte inoghe presentamus. At postu cuartinas, sonetes e otavas ma sos mutos fin sa manera de fagher poesia chi prus s'aculziaiat a s'animu sou prus fungudu.