Cantadores de Torpè______________________Antoni Maria Pala

A NOSTRA SIGNORA
(modellu)

Gloria e lode a su Divinu Re
cantan sos Chelos paris chin sa terra
ca est naschidu su 'e dare gherra
a sas culpas chi Eva at cumitidu
ca su 'e dare gherra nd'est naschidu
a sas culpas chi cumitidu at Eva.
O pecadore sa fronte sulleva
ca est nadu su Redentore tou
ispirende de Golgota in su monte.
O pecadore sulleva sa fronte
ca est nadu su tou Redentore
e sulleva sa fronte o pecadore
ca su tou Redentore nd'est nadu
su cales at redentu e at salvadu
s'intera discendenzia de Noè.
Cant'at sufertu in sa rughe pro te
at abbertu a sa gloria sas portas
e a su mundu intreu at dadu lughe.
Cant'at sufertu pro te in sa rughe
sas portas de sa gloria at abbertu,
cantu pro te in sa rughe at sufertu
at abbertu sas portas a sa gloria.
Cant'est eterna sa Sua vitoria
mantenzemas pulida sa cussenzia.

Gloria e lode a su Divinu Re
cantan sos Chelos paris chin sa terra
ca est naschidu su 'e dare gherra
a sas culpas chi Eva at cumitidu
ca su 'e dare gherra nd'est naschidu
a sas culpas chi cumitidu at Eva.
O pecadore sa fronte sulleva
ca est nadu su Redentore tou
ispirende de Golgota in su monte.
O pecadore sulleva sa fronte
ca est nadu su tou Redentore
e sulleva sa fronte o pecadore
ca su tou Redentore nd'est nadu
su cales at redentu e at salvadu
de Noè s'intera discendenzia.
Prenu de povertade e de passenzia
su Nazarenu est bennidu a su mundu
pro nos amustraret s'umilidade
de passenzia prenu e povertade
a su mundu 'ennid'est su Nazarenu
de povertade e passenzia prenu
su Nazarenu a su mundu est bennidu
a s'iscuru, a su fritu e senza 'estidu
send'etende abba e nie da s'aera.

Gloria e lode a su Divinu Re
cantan sos Chelos paris chin sa terra
ca est naschidu su 'e dare gherra
a sas culpas chi Eva at cumitidu
ca su 'e dare gherra nd'est naschidu
a sas culpas chi cumitidu at Eva.
O pecadore sa fronte sulleva
ca est nadu su Redentore tou
ispirende de Golgota in su monte.
O pecadore sulleva sa fronte
ca est nadu su tou Redentore
e sulleva sa fronte o pecadore
ca su tou Redentore nd'est nadu
su cales at redentu e at salvadu
de Noè sa discendenzia intera.
Eco s'istella in s'imbrunida sera
a sos pastores guida faghende
pro 'idere a Maria virginella
in s'imbrunida sera eco s'istella
a sos pastores faghende guida
eco s'istella in sa sera imbrunida
de guida faghende a sos pastores
e los acumpanzein sos lugores
finas chi in sa cabanna an postu pe.

Cantan sos Chelos paris chin sa terra
gloria e lode a su Divinu Re.