Cantadores de Torpè____________________________Carulinu Nonnis

UNU AMORE CUNTRASTADU
(brulla in otavas)

LIMBUTU
Zichedda mea si a mie as afetu
non deves cust'amore dinnecare
donnia momentu mi azzapo inchietu
chin sa mente pro ten'a rezilare,
finzas su note cando so in letu
a contu meu pro mi riposare
mi servit de assustu 'onzi rumore
semper pessande a su naschente amore.

ZICHEDDA
Non diat essere su baroniesu
chi mi diat a mie coglionare
faghe su piaghere 'istache atesu
si no as gana corfos de leare,
tue ti cres chi non t'apo cumpresu
chi ti cheres de me aprofitare
ma cussu mossu ti restat in bula
mancari chi ti paglia muda muda.

LIMBUTU
Mira chi custa est cosa de piachere
non b'at bisonzu de t'arrabbiare
pensa chi ti dimando pro muzere
non so in videa de minde coglionare,
de custu coro ti 'aco sa mere
sas ateras ti den imbidiare
ca si a mie picas o Zichina
sa vita ti la colas che reina.

ZICHEDDA
No minde sigas mancu a goliare
innantis chi ch'essemas in burdellos
ma puite mi dia innamorare
pro cuddos ogros tuos tantu bellos?
Jughes so ogros chi paren gemellos
De cuddos adatos po collare
chin cudda penetrante abbaidada
chi at su mantessi efetu 'e s'istocada.

LIMBUTU
Deus nde 'achet a donnia manera,
non b'at bisonzu e tinde coglionare
ma tue chi ti 'aches a bisera
non tenes propiu nudda a t'irghenzare?
Juches su culu cantu una pratera,
fachet ischifu pro t'abbaitare,
senza contare sos pilos famosos
longos unu 'urchiddu e lendinosos.

ZICHEDDA
A ite non ti faghes a bisera
pudderigu naschidu in su 'eranu,
jughes su nare cantu una salera
ei sas lavras russas una manu,
cantu su culu jugo che pratera
gai viu bi sias a manzanu,
cantu sos pilos jugo lendinosos
gai cuntentu t'idas e chin gosos.

LIMBUTU
Non b'at de ite sind'indeosare,
puzzi ite bruta, bae innoromala,
iscummito chi est senza si lavare
dae cudd'annu de s'annata mala,
solu in su lutu chi juchet in cara
bi potet su massaju semenare.
Non si connoschet si est niedda o 'aja,
bistire a dossu in colore 'e sisaja.

ZICHEDDA
Diaulu sa 'entre chi ses rutu,
brutu ischivizzu nare 'e mucone,
abberu cretes chi Zichedda Brutu
tenet su debbile 'e esser mandrone,
istasera ti 'ides cari allutu
de cust'iscorriada de chicone
e gai imparas a 'istare mudu
chin custu corfu dae coddu a trugu.

LIMBUTU
Pisti chi mi as mortu o fazzi fea,
senza tenner de me cumpassione,
tenite presente, sa mere mea,
de custa iscorriata de chicone
custa sera la ponzo in sa pelea
ca dao a s'arma sa relazione
e apo a biter si t'as a arranzare
cando 'enit Nosenzo a ti arrestare.

LIMBUTU
Buon giorno signor maresciallo meo
Domando la giustissia cun rejone,
mi è capitato un caso feo
questa mattina in casa del padrone,
la mia cumpanza a lu coddu meo
ha dato una scorriata di chicone
e io cherjo rinforzo a mi dare
pro la potere subitu arrestare.

MARESCIALLO
Si può sapere cosa vuoi tu
che l'italiano non sai parlare?
Tenta di dirmi il fatto come fu
perché ho altri affari da sbrigare,
ma Santo Dio, sbrigati zulù
tenta in qualche modo di spiegare,
ripeti stupidone per piacere
o vuoi ti prenda a calci nel sedere?

LIMBUTU
Li apo detto che la mia cumpanza
A me mi ha dato una ischiconata
Quella che caminande sempre manza,
che è sempre murri torta e ingristata,
mi ch'est bassedda grassa e pacu lanza,
mi chi no est ancora cojuata
e andat semper chin Nichele Frau
quella donna che a lei dice ciau.

MARESCIALLO
Tu mi hai fatto un miscuglio strano,
sei abbastanza cretino e testardo,
non ti spieghi affatto in italiano
e tan poco me lo dici in sardo,
ma vuoi che ti insegni con la mano
cosa vuol dire avere tanto azzardo?
Eccoti intanto povero coglione
per mia risposta questo scapaccione.

LIMBUTU
Ma questi non son modi da trattare
a una persona educata e benigna
o si lu potia a solu incontrare
in lochi di pochi ocri nella vigna
solu pro s'arrescarsi a mi mazare
menzus chi siche fuat dae Sardigna,
dialu su babbiscu chi l'at fatu
male 'ennitu siat, male incontratu.