Cantadores de Torpè__________________Salvadore Mattiu

VENUS
(otava serrada)

O fiores allegros de su 'eranu
a mudare una dea totu 'enide,
da s'Europa e da 'ogni oceanu
totu cantos a pare bos unide,
poi bi 'enzat Giotto e chin sa manu
chi fagat su retratu e permitide
chi ponzat s'iscritura dicrarada
"custa est Venus ermosa retratada"

S'iscriet chi est de Venus su retratu
sa ch'in Sardigna est torrada a naschire,
cussu ecellente mastru chi ti at fatu
pius de cussu podiat ischire.
Cleopatra d'Egitu at bellu tratu
ma chin tegus non podet resistire
pro ca ses un'Elena assimizante
coronada de grassias abbundante.

Sos assimizos nde tenes d'Elena
in tratare, in bellesa, in ermosura,
tue as sa pompa de Anna Bolena
sena falta peruna 'ista sigura,
tue allegras su sambene a donz'ena
solu pro t'iderene a sa figura,
ca ses un'ermosura peregrina
naschida sola in sa nostra marina.

Sola in custa marina ses naschida
pro ponner tantos coros a gherrare:
c'atiras prus de forte calamida
sas fiamas chi mustras pro ti amare,
fines ja pares de Chelu 'essida
sos anghelos ti an devidu formare,
chin s'ordine de s'amabile Criadore
fat'an a tie prenda de valore.

Sos anghelos e santos de sa gloria
t'an fatu chin sa manu onnipotente,
cumbenias iscrita in donzi istoria
pro lu dare a ischire a s'Ocidente,
in modu de restare sa mimoria
pro cantu durat su mundu vivente,
si in s'Oriente puru nde lu ischian
chi ses Judita bella narrer dian.

Diana narrer sos Betulianos:
"custa est Judita torrada a naschire"
e i sos Grecos chin sos Ispartanos
a jurare si dian atrivire
nende "cust'est Elena" e sos Trojanos
si diana a su lutu persuadire
meravigliados de tanta ermosura
afirman chi est d'Elena sa figura.

Pro Elena faghian juramentu
Ispartanos e Grecos ispantados.
Sa luna chin su sole in firmamentu
cand'essis tue parene grisados,
perden donzi vigore, 'onzi talentu,
sos astros de su chelu ritirados
in lestresa si firmana in s'aera
ca sa bellesa tua est prus fiera.

Sa bellesa chi mustras prenda rara,
no lu potet sa limba ispiegare,
in su mundu fit bella ancora Sara
ma non fit che a tie de incantare,
sos colores modernos de sa cara
paret sambene e nie 'ettadu a pare.
Ti dia cumparare chin Junone:
ma mancat a issa puru porzione.

Mancan totu sas deas contra a tie
s'esseren in su mundu rinnovadas,
umbe ses tue est semper a de die
finzas in cuddas notes oscuradas
sos prinzipes gherrende si den bier
chi an a issambenare sas ispadas
pro 'alanzare a tie, mela 'e oro,
s'impugnan sas ispadas in su coro.

Rosa amena, pro te ogni regnante
rialzare si det a ponner gherra
an a morrer sos prus in cuss'istante
disperados in tanta cuntierra,
Sa Sardigna det binchere triunfante
in totas chimbe partes de sa terra,
e tando den iscriere in s'istoria
chi sa Sardigna at tentu sa vitoria.