Cantadores de Torpè__________________Salvadore Mattiu

BRULLA DE CARRASEGARE
(otava serrada)

Frades caros de me bos lastimade
chi so che mummutone istrazzuladu,
dae su die chi mi so cojadu
perdid'apo 'ogni trancuiglidade.
Muzere mea no at piedade
de mi lassare goi iscosinzadu,
dae cando isposadu apo in cresìa
non m'at mancadu mai tribbulia.

Mai mi mancat tribbulazione
sempere so ricu de penas assai,
pro non cojare chin femina gai
menzus postu a sa fusilazione.
Muzere mea a donzi chistione
acudit lestra e non bi mancat mai.
Pro no mi esser gai cojuadu
in sa fasca m'aeren isvenadu.

Muzere mea lu tenet d'ausu
d'andare a umbe b'at contos de rier,
bator e chimbe 'ortas a su die
girat sa 'idda dae suta a susu,
andare isculta isculta l'intrat prusu
chi no a ponner tapulos a mie,
tota sa die la faghet girende
da una domo a s'atera iscultende.

Comente in custu mundu apo a campare
chi so disisperadu dae como,
s'istrazu de su letu chi mi dromo
est duos annos sena lu lavare.
In sete o ot'annos chi semus umpare
Chimb'o ses bortas mundad'at sa domo,
como che tocat dae su foghile
s'arga asserrada fin'a su jannile.

Si de totu sos fatos si cuntrastat,
ancoras chi a mie est disonore,
muzere mea est una acorradore
chi cojuende meda nde guastat,
sa limba mea sola no abbastat
a narrer cantu est mannu su dolore.
Dae minore mortu mind'essere
prima de l'aer apida a muzere.

A bos narrer su fatu coment'andat
mi nades chi so tropu 'entuleri:
issa paret muzere 'e cavaglieri
jeo sena calzone e ne mudanda
pro si leare listrones e randa
s'at postu sos onores a zilleri
e jeo pro non cherrere iscumparrere
nd'aia sa 'irgonza a bolu narrere.

A bolu narrere birgonza nd'aia
ca fit a murmurare a mie e totu,
si sos difetos l'aia connotu
menzus bajanu abbarradu mi fia
povera isfortunada vida mia
chi donzi die so in abbolotu,
si l'aia connotu sas bideas
oje non fit 'istada in costas meas.

Muzere mea est una mariola
miseru jeo chi l'apo a isposa
de cantu est zirulana, pritiosa,
est faulaglia e atriculajola
e ischit puru un'aterun'iscola
chi est che maghiaglia manerosa
e tenet aterunu naturale
chi a palas de totu narat male.

Pro finis custa est chei su giornale
in tota sa Sardigna publicada,
su sacerdote chi l'at batijada
in su batiju non b'at postu sale,
si bi lu naro pro la cherrer male
ancu mi dian una fusilada
si bi lu naro pro imposturia
d'una morte crudele mortu sia.

Males cantu at criadu su Signore
totu los tenet de naturalesa,
zarrone, jugh'e torra e fogaresa,
pazana, faulaglia e impostore,
carrogna, rufiana, acorradore,
critina, isfainada e currulesa,
ambiziosa, vile e presumida,
traitora, villana, imbestialida.