Cantadores de Torpè__________________Maria Zosepe Funedda

Una die, comente usaiana in sos tempos passados, chi si uniana sas zovaneddas totu a tropa fata e andaiana a campagna a boddire cardu e erva de coghere, totu sa cumpanzia de su 'ighinadu, s'est tucada a campagna e, pustis chi an fatu su carrigu de cardu e de erva de coghere, si sono postas a ballare; a cantare fit Maria Zosepe Funedda chi poscas at cumpostu sa cantone chi sighit:

SAS ZOVANAS DE TORPÈ
(otavas serradas)

Iscultadela totu sa poesia
ca so de vena e bos cheglio cantare
sa prima rima bos naro sa mia
ca m'agato de vena naturale
sa prus cantadora fit Maria
e i s'ateru restu po ballare
jeo fia 'e sa tropa sa prus manna
sa prima ballarina fit Juanna.

Parian ballarinas de innedda
fin divertende comente in festa
chie l'at cuminzadu est Boddoredda
sa pius delicada e tantu onesta
e tando b'est intrada Crabitedda
ca issa in su brincare est sa prus lestra.
A ballare a su ballu 'e s'imbassada
che fimus degheoto 'e camarada.

Totu nde cazzaimus bonas prosas
in mesu a degheoto 'e cumpanzia
duas chi bind'aiat lutuosas
fin Juannedda e Laura Maria
restana chin penare agunizosas
ana nadu "pro 'more 'e Deus siat"
e restan chin anneu a suspirare
bider su ballu e de non bi ballare.

Si suspiran chin pena bi at rejone
de si binde leare pensamentu.
Non b'est intrada Tilipa Puzone
ca non fin dies de divertimentu *
e nos at nadu a totu "atenzione,
ca sind'at bidu malu isperimentu"
non b'est intrada a su ballu brincadu
ca sa die aiat cunfessadu.

Aiat cunfessadu in determinu
pro no nos dare su cuntentu a nois,
sa parte de Luisa Marcunzinu
bi l'at testada a Elene Zinnoi
colat e narat unu pellegrinu
"custu ballu lu ballana in Gavoi"
Non b'est intrada Luisa a ballare
ca fit minore e galu a l'imparare.

Luisa s'at perdidu cussu gosu
de non cherrere intrare a divertire
una de cussas Juanna Pilosu
chi de bellesa podet presumire
a su babbu lu gramana dizzosu
ca l'at naschidu una rosa gentile
de cantu est bella e gentile sa rosa
est Juanna Pilosu luminosa.
Sa donosia sua est tantu manna
e innossente est che un'anzeledda,
bi fit Rimunda chin Larenta Sanna
ma non de agualare a Juannedda
prite nd'est prama de innare Osanna
ca est distinta dae minoredda
da innedda chend'enzat de Amore
pro l'isposare chin meritadu Onore.

Chend'enzat graduados in capeddu
a Juannedda pro la prezziare
ca mancari chi iscrian a Casteddu
una cumpagna non dene agatare.
Bi fit sa fiza 'e Caderina Nieddu
bella, onesta, e bona in su tratare
ma non dene agatare una cumpagna
mancari chi nde iscrian a s'Ispagna.

E chin custa las fago sas serradas
ca terminada in totu est sa cantone,
sas prusu chi bi fini assenziadas
fin Caderina e Teresa Bullone
ambas duas sorrastras istimadas
bellas de tratu e bonas de pessone
bonas totu su restu ateretantu
chi meritana lode, onore e bantu.

Sa cantone ajustada in allegria
totu a chent'annos che potan durare
iscultadela totu sa poesia
ca so de vena e bos cheglio cantare.

(*fit in tempus de caresima)