Cantadores de Torpè_____________________Juanne Maria Ispanu

Dami sa manu amante a ti tocare
ca so partende in terra furistera
si capitat ch'istento a che torrare
prontamente t'iscrio una litera,
ti mando sos saludos, prama 'era,
chi de me non ti des ismentigare.

Dami sa manu amante a ti tocare.

Ti mando sos saludos pro ammentu
chi non fago unu pagu 'e ritardanzia
non tinde les perunu pensamentu
semper chin megus apas isperanzia
da chi s'amore b'est in abbundanzia
si pregat vida a Deus de nos dare.

Dami sa manu amante a ti tocare.

Si pregat vida de nos dare Deus
pro 'enner de sas cosas a su prou.
Si tue ses intro su coro meu
jeo puru so intr'e coro tou
ca pares magine ch'an pintadu a nou
chi mi faghet su coro rallegrare.

Dami sa manu amante a ti tocare.

Ma non m'arreo mancu in Continente
ne in regnu Asiaticu o Africanu,
finzas ch'a tie non tenzo a sa manu
t'ap'aer semper in coro e in mente,
cantu pro vida t'ap'aer presente
de amore ti devo acuntentare.

Dami sa manu amante a ti tocare.

Su coro mi as ligadu chin cadena
amende a tie cantu biu duro
e ne ater'amante non che furo
comente an fatu a s'ermosa Elena,
mancari passe sa vida chin pena
amende a tie cantu ap'a durare.

Dami sa manu amante a ti tocare.

Columba ses che rosa in su 'eranu,
naschida a profumare su jardinu,
jeo ti tenzo incarnada in su sinu
a note e die, a sera e a manzanu;
istes frisca che abba 'e s'oceanu
e tardet s'istajone a t'allizare.

Dami sa manu amante a ti tocare.

Dami sa manu e istat'in bon'ora
e saluda 'ogn'amigu, 'ogni parente,
si male narat sa zente de fora
lassa narrer e non ponzas in mente
e de su narrer male de sa zente
pensa a mie e lassalos istare.

Dami sa manu amante a ti tocare.