Cantadores de Torpè__________________________Efis Mattiu

CLORIS
(otavas serradas)

Lughes che un'istella in s'aurora
in mesu a sas umanas criaturas
totu sos chi la 'iden sinde ammoran
de cantu atraet sa sua ermosura
mi paret Cloris bella incantadora
ch'a sos umanos su coro nde furat
sa cumpostura bella e adatada
chi sa pessone restat abbagliada.

Donzunu la disizat custa rosa
semper fozida che in su 'eranu.
Sa mirada chi faghet amorosa
furat su coro a donzi cristianu.
Est de totus sos tempos deliziosa,
frisca su sero che i su manzanu,
su cristianu a sa sua presenzia
certu mancat e pecat in cussenzia.

In cussenzia certu det mancare
custrintu a cummitire su pecadu,
de sas perfeziones de aprezzare
est donu su Signore chi li at dadu,
non bind'at una de l'agualare
de visu gai bellu e delicadu,
nde restat sullevadu 'ogni mortale
pro mirare su sou personale.

Si miran sa presenzia majestosa
restan finas sos tristos allegrados
sa cara robicunda che una rosa
chin sos bellos colores incarnados
ca ses naschida pro esser diosa
in mesus de sos lizos delicados
e restat incantadu chie la mirat
de cantu est bella tantu amore atirat.

Chie mirat su bellu visu sou
nde restat donzi coro innammoradu
est totu justu e no est contu nou
no est jeo chi l'apo immaginadu
est fatu veru e lu dao a su prou
chi no est faula su chi apo cantadu,
m'agato molestadu in sa pessone
pro discrier sa sua perfezione.

A la discrier coment'est distinta
sos modos suos, sa rosa galana,
adornada e de grassias recinta
est de sa gioventura capitana
non canto isageradu e no est finta
e nè invanu sos bantos li dana
est de sas baghianas sa prus bella
ch'a sa mirada sos coros fragellat.

A sa mirada fragellat su coro
son in suspetu de che la furare
finzas su prus incrudelidu moro
bidende a issa si det abbagliare
dizzosu chie lobrat su tesoro
biadu a chie l'at a balanzare
chie det isposare cussa dea
su tempus ch'istat biu si recreat.